Les Falles?

Les Falles ye una perconocida fiesta internacional de Valencia, la tercer ciudá más grande d’España. Poro, tamién hai falles n’otros sitios averaos, como Alzira, Dénia, Gandía, Xátiva y Orihuela.

Les Falles entamen el 15 de marzu y acaben el 19 de marzu (ye la nomada “Semana Fallera”) pero dende’l 1 de marzu, pues alcontrar variaos actos d’interés en Falles, sobre manera, fueos artificiales. L’Ayuntamientu de Valencia organiza los más de los eventos de les Falles, pero en tolos barrios hai comisiones falleres que cellebren la fiesta na so propia zona. Nosotros somos la Falla Josep María Haro-Poeta Mas i Ros, una comisión nel Distritu Marítimu de Valencia. Cada comisión fallera tien una reina mayor (la “fallera mayor”) y una reina infantil (la “fallera mayor infantil”), al tiempu que la ciudá de Valencia tien les sos propies reines falleres.

El fueu ye perimportante nes Falles. Dende’l 15 de marzu, Valencia llanta unos 380 monumentos de cartón-piedra nes cais. Cada monumentu llámase “falla” y asonsaña dalgún acontecimientu mundial de recién, con una escelente calidá artística. Cuando llega’l día 19 (día de San Xosé), les falles quémense a eso de les 12:00 a.m. Tolos díes ente’l 15 y el 19 de marzu, hai una “mascletá”, que son una descarga de fueos artificiales diurnos que faen un ruíu rítmicu. Pues ver fueos artificiales de toa triba en Valencia. Pa rematar la nueche hai grandes fueos artificiales con variáu coloríu cerca del vieyu calce del ríu Turia.

Esto nun ye too. Les Falles tienen música per dayuri y de contino, porque los valencianos ámenla. Pues alcontrar flores, grandes corríes de toros y folixa cada nueche. Si visites les Falles, namoraraste d’elles y de Valencia.

Más sobre la fiesta de les Falles en LocalFestivities.com (la mayor fiesta nel Top 50)

Traducción de Mª Xosé Rodríguez López (Responsable Oficina Municipal de la Llingua , Xixón, Asturias)