1. Venimos careciendo un grave procesu "sacralización" d'esta Costitución, por mor de que paeza inmutable (pesia que yá se-y ficieron dellos camudos cola xida de la entrada del Estáu español na Xunión Europea). Trátase d'un procesu "sacralización" enforma dogmáticu y represivu, que quier definir maniqueamente los "bonos" y "malos" ciudadanos/es en fonción de qu'obedezan sumisamente o refuguen esa Costitución.
   
   
2. La Costitución española foi aprebada nuna situación sociopolítica esceicionalmente inregular: nel acabu apautáu d'una dictadura militar de 40 años y baxo una importante presión militar que tenía un fuerte "ruxíu de sables" comu música de fondu. Estes circustancies desacrediten dafechu los mecanismos políticos y el referéndum qu'empobinó a la so aprebación.
   
   
3. La Costitución española, lloñe de ser un preséu pa garantizar les llibertaes, costitúi un mecanismu pa llendales nunos casos y pa recortales n'otros. Por si hubiere dubies, estos 25 años amosaron que nun garantiza drechos sociales básicos (a la igualdá, al trabayu, a la vivienda, a la vida digna,...) y que va a la escontra drechos homanos internacionalmente reconocíos, comu'l drechu d'autodetermín de losPueblos.                              
   
   
4. No que cinca específicamente a Asturies, la Costitución española supón pa nós una ñidia agresión: non sólo nun reconoz la nuesa condición de nación hestórica sinón que mos convirtió nuna "autonomía" dafechamente sometía al Estáu y col más probetayu nivel competencial posible.
   
   
5. Comu consecuencia la so aplicación, Asturies carez un "estatutu autonómicu" impuestu. Un "estatutu" que se mos prohibió votar. Un "estatutu" que ñega la nuesa rialidá y futuru comu Pueblu. Un "estatutu" que mos conderga a una situación de predemocracia permanente: reprímese la nuesa llingua; nun se garantiza'l drechu los asturianos/es a vivir y trabayar nel nuesu propiu país; tórgasemos el llexítimu drechu a decidir democráticamente'l nuesu futuru y perafítense les demás carencies democrátiques que mos impón la Costitución española.

Poro, nun mos vemos reflexaos nesa Costitución y trabayaremos pola superación del marcu xurídico-políticu anguañu vixente. Comu ciudadanos d'Asturies afitamos el nuesu drechu inrenunciable a definir en llibertá y democracia'l nuesu propiu marcu xurídicu-políticu, nel que se recueyan y respeten al empar los nuesos drechos sociales y nacionales.